"Königl. Placat, betreffende die erweiterunge des auff Schiffsbaw und anschaffunge eigener Schiffe denen Vnterthanen/ im Reiche vnd in den Provintzen/ den 15. Novemb. An. 1652. ertheileten Privilegij", 1653.

Königl. PLACAT,
Betreffende die erweiterunge des auff Schiffsbaw
und anschaffunge eigener Schiffe denen Vnterthanen/ im Reiche vnd in den Provintzen/ den 15. Novemb. An. 1652. ertheileten Privilegij.

Wir Christina/ von GOTtes Gnaden/ der Schweden/ Gothen vnd Wenden Köningen/ Großfürstin in Finland/ Hertzogin in Esthland/ Carelen/ Brehmen/ Verden/ Stettin-Pomern/ Cassuben vnd Wenden/ Fürstin zu Rügen/ Fraw vber Ingermanland vnd Wißmar. Thun zu wissen/ daß nach dem Wir vernehmen/ wie das Vnwesen in See/ wodurch der frembden Seglationen vnd Schiffart nach Vnsern vnterhabenden Landen vnd Reichen mercklichen verhindert werden/ noch nicht auffhören/ vnd Vnserer trewen Vntersassen/ besonderlich in denen Provintzen/ Esth- Lief- vnd Ingemanland/ wie auch in den Hertzogthümbern Brehmen/ Pomern/ vnd Wißmar eigene Schiffe/ zu der Wahren ab- vnd zufuhre/ zu deren grossen schaden vnd nach theil nicht zulangen wollen; Wiewol Wir sie auff alle jhnen zugehörige/ entweder ausser Reichs erbawete/ oder innerhalb vorgesetzten Termin/ den 1. Decembris An. 1653. von jhnen erkauffete/ oder auch in bemelten Provintzen gezimmerte Schiffe/ mit gleicher Freyheit vñ vorzug/ welche innerhalb Reichs erbawete Schiffe/ in allen zuläßlichen Haven in Scweden oder Finland geniessen/ gnedig versehen lassen/ wie solches Vnser vor diesen außgegangenes Placat de Dato Stockholm den 15. Novembris Anno 1652. weiter außweiset; Also haben Wir nun/ vmb aller vngelegenheit vorzukommen/ vnd alle Vnsere trewe Vntersassen zu ernstlicher fortsetzunge des Schiffbaws vnd anschaffnnge eigener Schiffe vmb so viel mehr zubewegen/ solch Vnser vor diesem außgegangenes Placat/ zu dero Nutzen vnd mehren auffnehmen/ gnedig extendieren vnd erweitern wollen/ dergestalt: Daß alle Vnserer trewen Vnterthanen Schiffe/ so entweder zum wenigsten mit 14. oder mit mehrern Stücken montiret/ oder doch so gebawet vnd gezimmert sind/ daß sie zum wenigste[n] 14. oder mehr Stücke zu jhrer defension/ führen können/ vnd entweder hier in Vnserm Reiche vnd denen vnter gehörigen Provintzen/ Est- Lief- vnd Ingermanland/ deß gleiches in Hertzogthümbern Brehmen/ Pomern/ vnd Wißmar/ sampt allen andern/ vnter Vnsern Reiche belegenen Haven vnd Orten/ von Eichen Holtz sind/ vnd werden auffgesetzet vnd gebawet/ oder iñerhalb vorgesetzten Termin/ nemblich den 1. Decmbris erstkommende gekauffet/ vnd Vnsern Vntersassen alleine zugehören/ nicht alleine wann solche nach Schweden oder Finland/ sondern auch nach allen Vns vnd der Crone gehörige vnd obbenamte Provintzen/ Est- Lief- vnd Ingermanland/ sampt Hertzogthümbern Brehmen/ Pomern/ vnd Wißmar kom[m]en/ in allen zulätzlichen Haven/ den dritten theil linderern Zoll/ so wol Einkom[m]ende als Ausgehende/ dege[n] frembde Schiffe/ von nun an geniessen sollen. Die andern Schwedischen vnd in den Provintzen gebawete/ oder auff obberührte weise eigen geschaffete Schiffe/ so entweder mit weniger Stücken oder Stücklöchern versehen; Item alle andere Schwedische Gefässer/ Fleyten ohne Stücke/ Schiffe/ Boyarte/ Kregare/ Schuten/ so in Vnsern Reiche vnd in darunter gehörigen Provintzen von Eichen Holtze gebawet/ auffgesetzet vnd außgereitet/ oder innerhalb den nechstkom[m]enden 1. Decembris An. 1653. an Vnsere Vntersassen von frembden verkauffet sind/ sollen/ wann sie in zulässigen Haven/ wie auch in den Provintzen/ Esth- Lief- vnd Ingermanland/ sampt Brehmen/ Pomern/ vnd Wißmar loschen oder laden/ den sechstentheil gelindern Zoll/ als die Frembden geniessen. In Summa/ alle Schiffe vnnd Gefäßer/ so laut obbenamten Placate de Dato Stockholm den 15. Novemb. An. 1652. alleine in Schweden vnd Finland/ wann sie einkommen oder auslauffen/ Freyheit geniessen solten/ sollen von dieser Zeit an/ auch in den bemelten Provintzen vnd allen darin belegenen Haven gleiche Freyheit vnd prærogativ/ wie binnen den Reich Schweden/ nach selbiger proportion vnd gelegenheit/ zu geniessen haben. Welches/ wie Wir es nach reiffen bedencken gut befunden/ vnd die vorigen gegebene[n] die Schiffahrt angehende Privilegia dergestalt gnedig erweitert haben; Also haben Wir zugleich in Vnsern Licent- und ZollCam[m]ern verordnet/ daß alle Licent-Taxe/ so bißhero üblich/ oder hiernechst eingerichtet werden können/ sollen auff berührte weise geproportioniret/ vnd diese Freyheit stracks/ so bald dieses Placat ihnen zuhanden kompt/ ins Werck gestellet werden. Wornach alle so Vns mit Gehorsamb vnd Pflicht verbunden/ vnd Vnsert wegen/ zu wollen vnd sollen/ zu thun vnd lassen oblieget/ Insonderheit Vnsere Ober Statthaltere/ General-Gouverneurs/ Landshöfdinge/ Zoll- vnd Licent-verwaltere/ sampt Burgermeistere vnd Rath in Städten/ wie auch alle andere/ so dieses angehet/ sich gehorsamblich werden zu richten haben/ zusehende/ daß weder von ihnen noch andern/ jemanden hierwider/ hinder/ nachtheil oder vorfang/ nun oder künfftiger Zeit zugefüget werde. Zu weiterer Bekräfftigunge haben Wir dieses eigenhändig vnterschrieben/ vnd Vnser Secret wissentlich hierunter vordrucken lassen. Gegeben auff Unsern Schloß Stockholm/ den 8. Julij Anno 1653.

Christina

Königl. Placat, betreffende die erweiterunge des auff Schiffsbaw und anschaffunge eigener Schiffe denen Vnterthanen/ im Reiche vnd in den Provintzen/ den 15. Novemb. An. 1652. ertheileten Privilegij
[Kongl. Tryckeriet], [Stockholm], [1653]. 2:mo, 16,5×19,5 cm, [4] s.

Transcribed by Lars Bruzelius.

The Maritime History Virtual Archives | Sveriges offentliga tryck | Search.